Registra pa un account di BOi

E siguiente informacion ta dirigi exclusivamente na personanan priva. E ta brinda ayudo na e personanan cu ta yenando e formulario di registracion online, pa nan por haya un account di BOi. 

Bo ta bay registra pa un account di BOi

Pa haya acceso na e portal BO impuesto (BOi), mester tin un account di BOi. Cu e account aki, Bo por consulta bo datonan di impuesto y haci uzo di otro servicionan online.

Registra pa un account di BOi, ta un proceso cu ta sosode cuidadosamente. Bo ta haya acceso na bo datonan personal di impuesto, cualnan ta informacion di caracter confidencial. 

Departamento di Impuesto kier ta sigur cu bo persona ta esun cu ta haciendo e registracion. Pa e motibo aki mester yena e datonan corectamente y completamente.

Bo ta un persona priva?

Bo ta wordo considera un persona priva, si Bo ta cumpli cu e siguiente condicionnan:

● Bo no tin un empresa propio (eenmanszaak);

● Bo no ta eherce un actividad den forma independiente, por ehempel como consehero (consultant), bendedo di loteria of mecanico di auto. 

● Bo no tin un empresa (persona huridico) of fundacion manera un NV of VBA.

Bo ta cumpli cu e tres condicionnan aki? E ora ey, Bo por registra aki pa haya un account di BOi.

Bo tin un empresa of ta eherce un funcion independiente? Den e caso aki, Bo no por registra aki pa haya un account di BOi. Click riba e siguiente link pa registra bo empresa.

Registra mi empresa (na Hulandes)

Cua ta e informacion cu mester?

Percura pa Bo tin e siguiente informacion na man:

  1. bo persoonsnummer;
  2. bo number di identificacion di Aruba (number di cedula);
  3. un number di cobransa di inkomstenbelasting di e ultimo 5 añanan;
  4. bo e-mail. 

Cu e informacion aki, Bo por completa bo registracion mas rapido y sin interupcion. 

Atencion

Si Bo no tin un persoonsnummer, Bo no por registra pa haya un account di BOi y Bo no por continua.

  • A continuacion Bo ta haya un splicacion di e datonan cu Bo mester yena den e formulario di registracion.
  • E siguiente splicacion ta basa riba e version na Ingles di e formulario di registracion.
Datonan di usuario (User Details)

Como usuario di e portal di BOi, Bo mester un account di usuario (user account) of kisas ya Bo tin un caba. 

Scoge e tipo di usuario cu ta coresponde na bo persona.

  • Mi no tin un account di usuario di BOi (I don't have a BOi user account)
  • Mi tin un account di usuario di BOi caba. (I already have a BOi user account)

Bo tin un account caba?

Si ya caba bo tin un account di usuario di BOi, Bo ta wak dos veld pa yena: 

  • Yena e nomber di usuario (username) y e-mailadres asocia cu bo account.
  • Click Next (Siguiente).

Si Bo a yena algo incorecto, Bo lo haya un mensahe di eror. Bay na e veld marca cu cora y coregi bo datonan. 

Bo no tin un account?

Si Bo no tin un account di usuario di BOi, Bo mester yena e siguiente informacion. 

Nomber di usuario (Username)

Bo nomber di usuario (username) ta e nomber cu bo ta log in den e portal di BOi. Bo mes tin cu crea bo nomber di usuario. Siguientemente Bo ta yena e nomber di usuario.

Ora cu click riba e veld pa yena, Bo ta wak e condicionnan cu e nomber di usuario mester cumpli cu nan.

E nomber di usuario:

  • mester tin entre 7 y 32 caracter;
  • mester contene por lo menos 1 letter [A-Z];
  • mester contene por lo menos 1 number [0-9];
  • mester contene un di e caracternan aki: - ! . _ (strepi, signo de sclamacion, punto, strepi abou)
  • no mester contene espacio;
  • no mester ta un palabra ofensivo.

Lesa tur e condicionnan di e nomber di usuario (na Ingles)

Observacionnan

  • Si bo nomber di usuario no ta cumpli cu e condicionnan, lo Bo haya un mensahe di eror.
  • No ta haci diferencia si a uza mayusculo of minusculo.
  • Nota bo nomber di usuario, pa Bo por uz'e facilmente despues. 

Unabes cu bo nomber di usuario keda aproba, Bo no por cambia esaki mas den futuro. 

Nomber (of otro)
  • Yena bo nomber (First Name) of otro nomber, por ehempel, bo nomber di cariño.
  • E nomber aki lo wordo asocia cu bo account di usuario.
  • Bo lo wak e nomber aki cada bes cu bo log in den e portal di BOi. 

Aki Bo por uza un otro nomber tambe. No ta necesario pa Bo yena bo nomber oficial. 

E nomber cu Bo scoge aki, Bo no por cambie den futuro. 

Fam (of otro)
  • Yena bo fam (Last Name) of un otro fam.
  • E fam aki lo wordo asocia cu bo account di usuario.
  • Bo lo wak e fam aki cada bes cu bo log in den e portal di BOi. 

Aki Bo por uza un otro fam of nomber tambe. No ta necesario pa Bo yena bo fam oficial. 

  • E fam of nomber cu Bo scoge aki, Bo no por cambie den futuro. 

E-mail
  • Yena bo e-mail (Emailaddress).
  • Confirma bo e-mail den e veld di Confirm emailaddress.
  • Click Next pa continua. 

Atencion

  • Uza un e-mail personal y no esun di bo trabou.
  • Uza un e-mail cu bo ta controla regularmente.
  • Bo e-mail ta unico. Esaki ta nifica cu ningun otro persona por uza e mesun e-mail pa registra y crea un account di BOi.
  • Bo e-mail ta hopi importante pa e comunicacion entre bo persona y Departamento di Impuesto. A traves di bo e-mail, Bo lo ricibi un e-mail:
    - pa confirma bo nomber di usuario;
    - cu bo password di un solo uzo (One-Time-Password of OTP);
    - ora mester reset bo password;
    - cu ta contene mensahenan importante.

Conseho

  • Crea un folder den bo mailbox pa warda e mailnan. Nunca delete e mailnan di Departamento di Impuesto.
  • Bo por crea tambe un e-mail specialmente pa bo asuntonan di impuesto. 

E consehonan aki no ta pa obliga Bo haci nan, pero nan por yuda Bo haya bo mailnan mas facil. 

Den e siguiente seccion, nos ta bay controla bo identidad. 

  • Yena bo datonan corectamente y completamente.
  • Si Bo no yena tur dato, por sosode cu Bo ta ricibi un e-mail den cual nos ta pidi Bo pa pasa na nos oficina principal. 
Persoonsnummer
  • Yena bo persoonsnummer (Tax Identification Number). E veld aki ta obligatorio pa yena. 

Bo ta haya bo persoonsnummer riba documentonan di impuesto manera:

  • recibo (kwitantie) di impuesto (por ehempel, bo recibo di impuesto di vehiculo di motor);
  • cobransa di impuesto (por ehempel, e cobransa di grondbelasting);
  • declaracion di impuesto (por ehempel, bo declaracion di inkomstenbelasting). 

Bo no tin persoonsnummer? E ora ey, Bo no por continua y bo mester stop cu bo registracion. 

Mas informacion encuanto persoonsnummer (na Hulandes).

Nomber
  • Yena bo nomber (First Name) manera menciona riba bo paspoort, rijbewijs of cedula.
  • Por uza tambe un cobransa di impuesto of declaracion di inkomstenbelasting pa yena bo nomber mescos cu e ta registra den nos administracion. 
Fam
  • Yena bo fam (Last Name) manera menciona riba bo paspoort, rijbewijs of cedula.
  • Por uza tambe un cobransa di impuesto of declaracion di inkomstenbelasting pa yena bo nomber mescos cu e ta registra den nos administracion. 
Fam di soltero (meisjesnaam)
  • Yena bo fam di soltero (Maiden Name). Esaki ta e nomber cu Bo tin desde nacemento.

E veld aki ta solamente pa hende muhe. 

Fecha di nacemento

Click riba e simbolo di kalender y sigui e pasonan aki:

  • Click riba e luna na e parti ariba y scoge e luna cu Bo a nace.
  • Despues, click riba e aña na e parti ariba y scoge e aña cu Bo a nace. Uza e flechanan ariba pa scoge un otro aña.
  • Click riba bo fecha di nacemento.
Number di identificacion di Aruba (Cedula-ID)
  • Yena bo number di identificacion di Aruba (Aruban Identification Number). E number aki yama tambe: number di cedula of cedula-ID).
  • Marca e hoki I do not have a cedula ID (Mi no tin cedula-ID), si Bo no tin un number di identificacion.
  • Bo ta registra na Censo Aruba? Den e caso aki, Bo tin un number di identificacion di Aruba. Bo ta haya e number aki riba bo cedula of un extracto di Censo Aruba. 

E number di identificacion tin e siguiente formato: AALLDDNN
E ultimo dos numbernan ta e numbernan di registro na Censo Aruba. 

Atencion

Bo no tin un number di cedula? Den e caso aki, Bo por ricibi un e-mail den cual nos ta pidi Bo pa haci un cita. Trece bo comprobante di identificacion valido manera paspoort, rijbewijs of cedula (di Aruba of otro pais). Esaki ta necesario pa nos verifica bo identidad. 

Number di cobransa di inkomstenbelasting (ultimo 5 añanan)
  • Yena e number di cobransa di inkomstenbelasting (income tax assessment number). Uza e number di un cobransa di e ultimo 5 añanan.
  • Bo no tin un number di cobransa of no ta registra pa inkomstenbelasting? E ora, laga e veld bashi y continua. 

Atencion

Bo no tin un number di cobransa? Den e caso aki, Bo por ricibi un e-mail den cual nos ta pidi Bo pa haci un cita. Trece bo comprobante di identificacion valido manera paspoort, rijbewijs of cedula (di Aruba of otro pais). Esaki ta necesario pa nos verifica bo identidad. 

Bo ta casi cla!

Aki ta sigui e instruccionnan pa completa bo registracion y kico por spera despues. 

Controla y manda bo registracion
  • Click riba Review pa controla e datonan cu Bo a yena cuidadosamente.
  • Click riba Edit pa cambia algo. Bay na e veld unda ta desea di haci cambio.
  • Click riba Submit si bo datonan ta corecto. 

Ora cu click riba Submit, lo bay aparece un 'bentana' unda Bo tin cu haci e siguiente declaracion:

I declare that I have entered the requested information clearly, truthfully, and without any reservations. 
(Mi ta declara cu mi a yena e datonan rekeri den forma cla, firme y sin reserva).

  • Click den e hoki pa confirma bo declaracion.
  • Siguientemente, click riba Submit pa manda bo registracion pa nos.

Despues di manda bo registracion pa nos, Bo lo bolbe na e pagina inicial. Por cera esaki. 

Cancela bo registracion

Bo ta desea di cancela bo registracion? Click Cancel (wak e boton mas abou). Bo lo haya e siguiente mensahe:

The data you have entered will be lost. Would you like to continue?
(E datonan cu Bo a yena lo bay perdi. Bo ta desea di continua?)

  • Click riba Yes pa cancela e registracion. Bo lo bay bek na e pagina inicial.
  • Click riba No pa continua cu Bo registracion. 
Bo registracion ta den tramite

Una bes cu nos ricibi bo registracion, nos lo verifica bo datonan. Si nan ta corecto, Bo lo ricibi dos e-mail:

  1. un e-mail cu bo nomber di usuario (username);
  2. un e-mail cu bo password di un solo uzo (One-Time-Password u OTP).

Consehonan

  • Warda bo nomber di usuario y password den un luga sigur. Sea sigur cu Bo por hayanan facilmente.
  • Nunca duna bo nomber di usuario y password na un otro persona, ni sikiera na bo famia of un consehero fiscal. Esaki ta hopi importante.
  • Bo ta desea di duna un otro persona acceso na bo datonan di impuesto? Por haci esaki a traves di bo portal BOi.

E persona cu Bo duna acceso na bo datonan di impuesto, no tin mester di haya bo informacion pa log in den bo portal. 

Log in den bo portal BOi

Una bes cu Bo ricibi bo nomber di usuario (username) y password, Bo por log in den e portal BOi. 

 Habri e pagina inicial di BOi

Despues di log in, e sistema lo bay pidi Bo pa configura (set up) Autenticacion Mulfi-Factor. Aki ta trata di un medida di seguridad adicional, pa protehe bo datonan contra personanan no-autorisa cu ta purba haya acceso na bo informacion di impuesto. 

Mas informacion encuanto Autenticacion Multi-Factor (na Ingles)

This page