ORANJESTAD – Departamento di Impuesto ta recorda su contribuyentenan cu e fecha final pa locual ta pago di impuesto di vehiculo di motor di e di dos mita di aña 2021 ta 30 di juni 2021. Pa por facilita  e contribuyentenan mas tanto posibel, Departamento di Impuesto a introduci e servicio di pago parcial na november ultimo. Cu e servicio aki e contribuyentenan por haci pago di impuesto di vehiculo di motor delanta den pida pida, aliviando asina e peso financiero cu ta mas grandi ora cu paga e impuesto den un solo biaha. 

E condicionnan

E condicionnan pa e servicio di pago parcial ta lo siguiente:
•    Ta paga impuesto di vehiculo di motor delanta
•    Ta haci e pago pa luna
•    Ta paga e suma minimo rekeri sea Afl. 50 of Afl. 200 (depende e categoria di plachi).
•    No por paga menos cu Afl. 50 a menos cu e debe (restante) ta menos.
•    Ta haci e ultimo pago mas tarda riba e fecha final. 

E servicio di pago parcial ta valido unicamente pa pago di impuesto di vehiculo di motor. 

Pago minimo ta depende e categoria di plachi

E pago minimo pa luna ta depende den cua categoria di plachi e vehiculo a wordo registra. Aki ta sigui un skema.

Categoria di plachi    Suma minimo pa luna
A, V, MFA, MFV, TR, V,
B (bus chikito)
AG, BR, GAR		Afl. 50
B (bus grandi)
Plachi personalisa
DT, O, T		Afl. 200

Por haci pago di awor caba


Si e contribuyente ainda falta pa paga e segundo parti di impuesto di vehiculo di motor 2021, no ta necesario pa warda te ora e fecha final ta cerca pa cumpli cu e pago den un solo biaha. Na e momentonan aki ainda tin chens cu por haci e pago den 2 biaha. Ultimo pago mester sosode prome of riba dia 30 di juni venidero. 

Online Banking

Alabes Departamento di Impuesto ta recomenda su contribuyentenan pa paga via e sistema di Online Banking di e banconan local, uzando e metodo di “Bill Payment”. 

Pa e pagonan online por wordo procesa debidamente, ta importante pa inclui e siguiente informacion:
- Persoonsnummer na cual e vehiculo ta registra
- Number di auto
- E periodo di cuenta cu ta pagando (por ehempel: jul-dec 2021)

Por acudi tambe na e oficina principal na Camacuri, e MFA-nan of edificio di Post Aruba na San Nicolas.

Cumpli cu e pago na tempo


Cu e sistema di pago parcial, Departamento di Impuesto ta ofrece e contribuyentenan e espacio pa por cumpli na tempo y asina evita gasto extra innecesario cual ta e boet administrativo di 50% riba e saldo di impuesto habri. Si no cumpli cu e pago na tempo, e boet ta wordo procesa y añadi na e debe di impuesto automaticamente riba dia 1 di Juli 2021. Den e caso aki e contribuyente lo ricibi un cobransa adicional (naheffingsaanslag). 

Pa mas informacion, bishita www.impuesto.aw pagina di informacion di impuesto di vehiculo di motor na
https://www.impuesto.aw/wanneer-moet-u-motorrijtuigbelasting-betalen/

Gerencia di Departamento di Impuesto
18 di mei 2021