Subi e website pa haci un cita awe mes!

ORANJESTAD – Departamento di Impuesto ta participa cu entrante awe, 8 di september 2020, ta posibel pa contribuyentenan haci un cita pa entrega nan declaracion di inkomstenbelasting como tambe winstbelasting 2019. Pa traha un cita e contribuyente por subi nos website www.impuesto.aw y riba e homepage click riba ‘Afspraak maken’. Unabes cu un cita wordo traha e contribuyente lo ricibi un confirmacion via di su e-mail den cual ta indica e fecha y ora cu e lo por pasa entrega dicho documentonan na e edificio principal na Camacuri. Contribuyentenan cu tin dificultad pa traha un afspraak digitalmente semper por yama e funcionarionan cu ta atende cu servicio na cliente (“customer service desk”) na 5227424 of 5227423.

Ta importante pa agrega cu Departamento di Impuesto no a elimina e posibilidad pa entrega e declaracion di inkomstenbelasting y winstbelasting 2019 sin un cita. Sinembargo, conforme e reglanan di DVG, Departamento di Impuesto ta limita e cantidad di bishitante y ta permiti pa haci entrega di e documentonan aki bou di cierto condicionnan. 

Aki ta sigui e condicionnan pa entrega declaracion di inkomstenbelasting y winstbelasting 2019 sin un cita:

  • Ta acepta maximo 3 declaracion di inkomstenbelasting of winstbelasting pa persona
  • Pa entrega mas cu 3 declaracion ta necesario pa haci un cita
  • Mester ta un pensionado (60 plus) pa haya preferencia entre 8:00am y 10:00am
  • Contribuyente cu no ta 60 plus por presenta desde 10:00am

Departamento di Impuesto ta pidi tur contribuyente pa cumpli cu nan orario stipula conforme nan cita, pa di e forma aki tur cos por bay di un manera structura y segun e reglanan vigente pa proteha nos salud.

Gerencia di Departamento di Impuesto
8 di september 2020