ORANJESTAD – E ultimo dia pa paga impuesto di vehiculo di motor 2020 a cambia y awor ta 28 di februari 2020. Manera conoci, e fecha final di acuerdo cu ley ta 31 di januari 2020, pero minister di Finansas, Economia y Cultura a tuma e decision pa extende e periodo un poco mas. Asina e contribuyentenan por haya mas espacio pa por efectua e pago. Aki ta sigui algun otro informacion di importancia. 

Tarifa di impuesto y gasto di plachi


E tarifa di impuesto di vehiculo di motor di aña 2020 y e gastonan di e plachinan a keda mescos cu aña 2019. E gastonan ta Afl.12 pa e plachi grandi y Afl. 8 pa e plachi chikito. Contribuyentenan cu ta paga e prome mita di aña, ta paga Afl.12 pa e plachi grandi y esnan cu ta paga ful aña lo mester paga Afl. 20 pa e plachi grandi y chikito. 

Pago den un of dos bes pa aña


Pa e siguiente categorianan di number mester paga e impuesto den un solo biaha: D, AG, BR, GAR, MFA, MFD, MFV y plachi di nomber. Pa tur otro categoria por scoge pa paga e impuesto den un of dos bes pa aña.  
 

Haci pago

Por haci pago online via banco of na tur oficina di Departamento di Impuesto, pues tanto na oficina principal na Camacuri of un oficina den districto.  
Ta bon pa tene na cuenta cu no ta posibel pa paga e impuesto di aña 2020, si no a paga e impuesto di e aña(nan) anterior.

Klik hier voor onze bankrekeningnummers.

Plach’i number


E color di e plachinan di number di aña 2020 ta fondo blanco cu cifra/letter cora. Ta planea pa distribui esakinan na maart proximo.

Plachi di nomber

E plachinan di nomber (“naamplaten”) si ta disponibel caba. Despues di pago, e contribuyente lo ricibi un carta, cual e lo entrega na e compania indica pa laga traha e plachinan. Despues Departamento di Impuesto lo avisa e contribuyente ki dia e por pasa busca su plachinan. Pa busca e plachinan mester trece e comprobante original di seguro valido. Tambe mester trece e comprobante di registro di e vehiculo. 
 

Departamento di Impuesto ta recomenda pa haci e pago mas lihe posibel y no warda te na ultimo momento, mirando cu e cantidad di numbernan registra ta  grandi. 

Gerencia di Departamento di Impuesto
14 di januari 2020