Por entrega verzamelloonstaat y verzamelstaat opgaaf derden 2018 tambe

ORANJESTAD – Cu e meta pa brinda mas y miho servicio na su contribuyentenan, Departamento di Impuesto (DIMP) ta habri e posibilidad pa nan por entrega e declaracion di e.o. BBO/BAVP, BAZV y loonbelasting di e luna di februari, na un di su oficinanan den districto tambe, esta sea na MFA Noord, MFA Paradera, MFA Santa Cruz, MFA Savaneta of Oficina di gobierno na San Nicolas. E servicio extra aki ta valido solamente pa diabierna awor dia 15 di maart 2019 y ta specialmente pa e clientenan cu ta haci pago di impuesto online y pues solamente mester entrega nan declaracion.

Alabes DIMP ta informa cu diabierna awor, tambe ta posibel pa entrega e verzamelloonstaat y verzamelstaat opgaaf derden di aña 2018 – cu no ta riba USB stick - na un di e oficinanan menciona. E fecha final pa entrega e verzamelloonstaat y verzamelstaat opgaaf derden di aña 2018  ta 1 di april 2019.

Departamento di Impuesto ta recomenda su clientenan cu solamente tin mester di entrega e declaracion of verzamelstaten, pa acudi na un di e oficinanan den districto. Door cu no ta bay haci pago, no tin mester di tuma un number. Por bay directamente cerca e personal (no e cahero) cu lo tey specialmente pa controla y stempel e documentonan.  Pa e clientenan cu mester haci pago, nan si mester tuma un number y acudi na e cahero.

Gerencia di Departamento di Impuesto
12 di maart 2019