Dia 15 di mei proximo ta e fecha final pa haci declaracion y pago di impuesto di luna di april
Publica riba Facebook dia 2 di mei 2020
Dia 15 di mei proximo ta ultimo dia pa entrega e declaracion di luna di april 2020 di entre otro BBO, loonbelasting, toeristenheffing y speelvergunningsrecht y haci e pago di impuesto corespondiente.
Lesa tambe
Haci declaracion y pago den forma digital
Bo mester entrega bo declaracionnan mensual den forma digital via nos portal online ‘BO impuesto’ (of ‘BOi’). Pa loke ta pago, nos ta pidi pa haci esaki online via bo banco.
Unabes cu entrega e declaracion digital, Bo NO tin mester di bin entrega e hardcopy na nos oficina na Camacuri. Nos no ta stempel y/of tuma niun formulario di impuesto mensual na nos balie.
Situacion di crisis
Nos ta consciente cu actualmente tin compania cu no ta operando of ta operando cu recursonan limita debi na e situacion di crisis. Si acaso bo compania no tawata activo of e volumen di benta (omzet) di april ta nihil, Bo tin e obligacion pa entrega e declaracion di BBO/BAVP/BAZV cerca nos. Si e ‘omzet’ ta nihil, e ora ta yena e cifra 0 na e hokinan corespondiente. Mescos ta conta si bo compania no tawatin empleado den servicio y pues Bo no a paga salario y e primanan social.
Semper tene na cuenta cu mester cumpli cu e deber di entrega e formulario di impuesto mensual apesar cu e benta ta ‘0’. Si esaki no ta e caso, ta yena e volumen di benta cu a keda realisa durante e luna di april 2020 den e formulario di impuesto online.
Plan di Alivio Fiscal 2020
Manera ta conoci, e Plan di Alivio Fiscal ta valido pa e lunanan april te cu juni 2020. Si bo compania a wordo afecta pa COVID-19, Bo por bin na remarke pa e siguiente facilidadnan.
- Haya prolongacion di 3 luna riba e pago di BBO/BAVP/BAZV, toeristenheffing, speelvergunningsrecht, bijzondere belasting verblijf (BBV) y bijzondere belasting op verhuurauto’s en verhuurmotorfietsen (BBVAM).
Asina Bo ta haya mas tempo pa haci e pagonan corespondiente mientras cu durante e lunanan aki Bo ta retene placa efectivo den caha pa cumpli cu otro obligacionnan.
- Como dunado di trabou, Bo no tin mester di paga bo contribucion di AOV/AWW di luna di april.
Pa e puntonan menciona tin condicionnan aplicabel.
Aplica pa Plan di Alivio Fiscal
Pa aplica pa e facilidadnan ariba menciona, Bo mester haci e peticion via bo declaracion mensual den nos portal ‘BO impuesto’. Solamente e peticionnan cu drenta via ‘BO impuesto’ lo wordo trata.
No tin acceso na ‘BO impuesto’?
Si ainda Bo no tin acceso na nos portal ‘BO impuesto’, por fabor registra bo compania mas lihe cu ta posibel. Tur compania sea chikito of grandi mester registra pa asina por haci nan declaracion di un manera digital.
Click aki(externe link) pa haci un cita.
Pa mas informacion por consulta e website aki, mail nos na boi@impuesto.aw of yama nos na 5227437.