DIMP ta continua cu mehoracion di su servicionan

ORANJESTAD Departamento di Impuesto (DIMP) ta den pleno ehecucion di diferente projecto riba tereno di digitalisacion pa asina mehora e calidad di servicio na su contribuyentenan. Un di e servicionan cu ta hopi pidi ta e tratamento di e peticion conoci como “Verzoek vermindering loon”. Esaki ta un peticion cu tur empleado – pues un persona cu tin un doño di trabou - y cu ta pagando interes riba fiansa personal y/of hipoteca, por haci.  

Salario anual di e empleado

Un doño di trabou tin cu calcula e salario anual (zuiver voljaarsloon) di su empleado y a base di esey e ta calcula cuanto loonbelasting e empleado mester paga den un aña. Den e calculacion, e doño di trabou no ta tene cuenta cu e gastonan personal di e empleado.

Reduccion di e salario anual calcula

E empleado por pidi pa reduci e salario anual cu su doño di trabou a calcula p’e. E ta haci esaki ora e y/of su casa tin gasto di interes di por ehempel un fianza personal y/of hipoteca. E empleado no por djis pidi su doño di trabou pa baha su loonbelasting. E mester entrega e peticion “Verzoek vermindering loon” na Departamento di Impuesto hunto cu e comprobantenan manera carta di interes di banco.

Inspector di impuesto lo controla e documentonan y tuma un decision pa medio di un “beschikking”. E empleado na su turno lo duna su doño di trabou e decision aki pa por ehecuta esaki. Reduccion di e salario anual calcula ta nifica cu e empleado lo bay paga menos loonbelasting durante e aña concerni y asina ricibi un suma poco mas halto den su man cada bes cu e cobra.

Con por entrega e peticion?

Pa hacie mas facil pa e empleado, awor Departamento di Impuesto ta implementa e porta digital pa asina por upload e peticion hunto cu tur e comprobantenan necesario. Riba e pagina principal di www.impuesto.aw ta click riba “Digitale formulieren” y despues scoge “Verzoek vermindering loon(externe link)”. E ta un formulario digital cu ta simpel pa yena y upload e documentonan. Di e forma aki Departamento di Impuesto ta facilita su contribuyentenan pa entrega e documentonan sin tin mester di yega na su oficina personalmente.

Pa informacion mas detaya, por consulta e website di Departamento di Impuesto www.impuesto.aw.

Gerencia di Departamento di Impuesto
3 di september 2020