Mientrastanto a cuminsa traha riba inkomstenbelasting di aña 2022

ORANJESTAD – E trabounan na Departamento di Impuesto ta avansando cu pasonan firme y sigur, pa asina por cumpli cu tur e contribuyentenan cu ta cumpliendo debidamente cu nan responsabilidad di impuesto. Den e prome mita di aña 2023, a paga un total di 15.4 miyon florin como pago di restitucion na e contribuyentenan cu a paga impuesto di mas.

Restitucion den prome mita di aña 2023

Den e prome 6 lunanan di aña 2023, tawatin 8.286 caso di restitucion cu a keda realisa, pa cual a paga en total 15.4 miyon florin. E pagonan di restitucion ta toca diferente aña, pero e sumanan mas grandi di pagonan haci ta relaciona cu inkomstenbelasting di e añanan 2019, 2020 y 2021. 

Aki ta sigui un bista di e pagonan di restitucion di impuesto den e prome mita di aña 2023.
 

Periodo       Cantidad di caso Restitucion (Afl.)
Januari 2023              697        1.4 miyon
Februari 2023           1.775        3.3 miyon
Maart 2023           2.102        3.3 miyon
April 2023           1.151        2.7 miyon
Mei 2023           1.298        2.2 miyon
Juni 2023           1.263        2.5 miyon
                   Total            8.286     15.4 miyon

Inkomstenbelasting di aña 2022

Mientrastanto Departamento di Impuesto a cuminsa saca e cobransanan definitivo di inkomstenbelasting di aña 2022 di esnan cu a entrega nan formulario di inkomstenbelasting 2022 caba. Pues e contribuyentenan por conta cu den e lunanan venidero nan lo haya nan “definitieve aanslag” di aña 2022 via post. Esnan cu ta sperando un suma di restitucion y no tin debe di otro impuestonan habri, por spera tambe nan placa riba nan cuenta di banco. P’esey ta hopi importante pa percura pa tur debe di impuesto y e informacion di cuenta di banco ta na ordo. Si tin cambio di banco y/of di cuenta, ta recomendabel pa notifca e departamento mesora. Esaki por sosode solamente online via www.impuesto.aw/bankrekeningnummer.

Cumpliendo cu su contribuyentenan

Como un organisacion di gobierno serio y responsabel, Departamento di Impuesto tin como meta pa cumpli cu su contribuyentenan. E contribuyentenan cu a percura pa nan declaracion di inkomstenbelasting wordo entrega na tempo, tin gastonan deducibel y cu a paga pues di mas na impuesto, tin derecho riba pago di restitucion si a caso no tin otro debenan di impuesto habri. Esaki ta mas cu un deber pa e departamento. E tin un prioridad halto. P’esey tambe Departamento di Impuesto a implementa diferente plan di accion pa por elimina e atrasonan den e cobransanan aki y e obhecionnan cu tin pendiente. Ta trata principalmente di atrasonan den inkomstenbelasting caminda a logra elimina esakinan den un forma structura y cu un empeño grandi di su funcionarionan publico. 

E contribuyentenan por conta cu Departamento di Impuesto no ta para keto y ta keda mehora y digitalisa su procesonan pa asina ta mucho mas eficiente y eficaz.  

Gerencia di Departamento di Impuesto
24 di augustus 2023